ലോക ഫുട്ബോളിലെ മറ്റൊരു കരുത്തരായ ടീമിനോടും ഇന്ത്യന് പുരുഷ ദേശീയ ടീം കൊല്ക്കത്തയില് കളിക്കും. ഒക്ടോബര് 6-ന് സാള്ട്ട് ലേക്ക് സ്റ്റേഡിയത്തില് നടക്കുന്ന അന്താരാഷ്ട്ര സൗഹൃദ മത്സരത്തില് രണ്ടുതവണ ഫിഫ ലോകകപ്പ് ചാമ്പ്യന്മാരായ യുറഗ്വായ് ഇന്ത്യയെ നേരിടും. ഓള് ഇന്ത്യ ഫുട്ബോള് ഫെഡറേഷന്റെ അറിയിപ്പ് പ്രകാരം, സെപ്റ്റംബര് 26-ന് ബെംഗളൂരുവില് പനാമയ്ക്കെതിരെ നടക്കുന്ന മത്സരത്തിനും ഒക്ടോബര് 3-ന് കൊല്ക്കത്തയില് അഞ്ചുതവണ ലോക ചാമ്പ്യന്മാരായ ബ്രസീലിനെതിരെ നടക്കുന്ന ഏറെ പ്രതീക്ഷയോടെ കാത്തിരിക്കുന്ന പോരാട്ടത്തിനും ശേഷം ഇന്ത്യ കളിക്കുന്ന ഈ വിന്ഡോയിലെ മൂന്നാമത്തെ പ്രമുഖ അന്താരാഷ്ട്ര സൗഹൃദ മത്സരമായിരിക്കും ഇത്.
അന്താരാഷ്ട്ര ഫുട്ബോളില് ഏറെ നേട്ടങ്ങള് കൊയ്ത ടീമുകളിലൊന്നായ യുറഗ്വായ് നിലവില് ഫിഫ വേള്ഡ് റാങ്കിങ്ങില് 20-ാം സ്ഥാനത്താണ്. യുറഗ്വായിയുടെ നിലവിലെ ഹെഡ് കോച്ചായ ഡിയേഗോ ഫോര്ലാന് 2016-ല് മുംബൈ സിറ്റി എഫ്സിക്ക് വേണ്ടി കളിച്ചിട്ടുണ്ട്. ഒരേ ഫിഫ വിന്ഡോയ്ക്കുള്ളില് തന്നെ ലോകകപ്പില് കളിച്ച മൂന്ന് രാജ്യങ്ങള്-പനാമ, ബ്രസീല്, യുറഗ്വായ്-ഇന്ത്യ സന്ദര്ശിക്കാനൊരുങ്ങുന്നതോടെ, ഇന്ത്യന് ഫുട്ബോള് പ്രേമികള്ക്ക് മുന്പെങ്ങുമില്ലാത്തവിധം അന്താരാഷ്ട്ര ഫുട്ബോള് വിരുന്നൊരുക്കിക്കൊണ്ടാണ് യുറഗ്വായുടെ കൊല്ക്കത്തയിലേക്കുള്ള വരവ്.
അതേസമയം, ഫിഫ പുരുഷ അന്താരാഷ്ട്ര മാച്ച് വിന്ഡോയില് സെപ്റ്റംബര് 26-ന് പനാമയ്ക്കെതിരെ നടക്കുന്ന ഇന്ത്യന് സീനിയര് പുരുഷ ദേശീയ ടീമിന്റെ അന്താരാഷ്ട്ര സൗഹൃദ മത്സരത്തിന് ബെംഗളൂരുവിലെ ശ്രീ കണ്ഠീരവ സ്റ്റേഡിയം വേദിയാകുമെന്ന് ഉറപ്പായിട്ടുണ്ട്. 2023 സാഫ് ചാമ്പ്യന്ഷിപ്പ് ക്യാമ്പയിന് ശേഷം ബെംഗളൂരുവില് ബ്ലൂ ടൈഗേഴ്സിന്റെ ആദ്യ മത്സരമായിരിക്കും ഇത്. അന്ന് ഫൈനലില് കുവൈത്തിനെ പരാജയപ്പെടുത്തി സ്വന്തം മണ്ണില് ഇന്ത്യ കിരീടം ഉയര്ത്തിയിരുന്നു. ആ ടൂര്ണമെന്റിലുടനീളം ബെംഗളൂരുവിലെ കാണികളില് നിന്ന് വലിയ പിന്തുണയാണ് ഇന്ത്യന് ടീമിന് ലഭിച്ചത്.
നിലവില് ലോക റാങ്കിങ്ങില് 44-ാം സ്ഥാനത്തുള്ള പനാമ ഇന്ത്യയ്ക്ക് മികച്ചൊരു വെല്ലുവിളി തന്നെയാകും ഉയര്ത്തുക. 2026 ലെ ഫിഫ ലോകകപ്പില് മത്സരിച്ച ഈ മധ്യ അമേരിക്കന് രാജ്യം ഇന്ത്യയ്ക്കെതിരെ കളിക്കുന്നത് സെപ്റ്റംബറിലെ മത്സരത്തിന് വലിയ പ്രാധാന്യം നല്കുന്നു. ഒക്ടോബര് 3-ന് കൊല്ക്കത്തയില് വച്ച് അഞ്ചുതവണ ലോക ചാമ്പ്യന്മാരായ ബ്രസീലിനെയും തുടര്ന്ന് ഒക്ടോബര് 6-ന് യുറഗ്വായിയെയും നേരിടുന്നതിന് കൃത്യം ഒരാഴ്ച മുമ്പ് നടക്കുന്ന ഈ മത്സരം, തിരക്കേറിയ അന്താരാഷ്ട്ര കാലയളവില് ഒരു ലോകകപ്പ് ടീമിനെതിരെ ഇന്ത്യ കളിക്കുന്ന ആദ്യ സൗഹൃദ മത്സരമായിരിക്കും.
content highlights: Uruguay Set to Tour India; Friendly Match Against Blue Tigers in Kolkata